السبت، 26 ديسمبر، 2009

الذكرى السنوية والاجازة السنوية


السلام عليكم ورحمة الله وبركاته
اخواتي واخوتي المدونين اليوم ساتكلم في عده نقاط

اولا " ذكرى الحرب
فقد مر عام كامل على ذلك اليوم يوم السبت الذي اغدق علينا فيه سرب كامل من طائرات الاف 16 بحقد لن يزول ، مر عام وما اسرع مروره فكأن الحرب كانت البارحة فلا زالت اصوات الطائرات ترن في آذاننا ولا تغيب مشاهد القصف مخيلاتنا ولا تغيب تفاصيله عن التصاقها بحياتنا ولا تغيب آثاره عن يومنا هذا






فهي حرب مستمرة لم تبدا قبل عام ولم تنتهي بعده ايام
فلا زالت حرب الحصار والجدار قائمة
ولا زال جل العالم يشارك في التنازل عن انسانيته بصمته الرهيب
ولكن لا انسى من تلك الايام ان اشكر كل من رفض الحرب وكل من تظاهروا من اجلنا فقد كنتم تقدمون لنا دعما وان كان معنويا فقط وكل من دعا لنا
واعود اطالب ذات الضمائر بالوقوف لجانب غزة التي لازالت تعاني من الحصار
ربما لن امعن في سرد ذكريات تلك الايام ولكني كنت قد كتبت بضع كلمات اصف لكم بها شعوري وحالي عند لحظات لطالما حسبتها تسبق الموت فعندما تهم الطائرة الحربية بانزال الصاروخ نسمع له صوتا وما هي الا اجزاء من الثانية حتى نسمع صوت انفجاره ولكن هذه الثوان ما بين نزوله من السماء وما بين سقوطه كنت اترقبها
قبل الموت بثواني




فجأة تسمع صوت الزحف يقرب
صوت الجنازير ماشية على الارض تسقطها
نتلم حولين بعض
مهو محدش يحب يموت لوحدو
تلاقي الدنيا صارت ضباب
وريحة البارود تخنق ماليه الدنيا
ومن غير استئذان..........
تلاقي الارض تتهز من تحتك
والسقف عاوز يقع عليك
والشبابيك والبيبان تصفر
والقزاز يطاير جوة وبرة
حسب الضرب هو فين
وتلاقي السما تهدر بصوت فظيع
وغربان السما رايحة جاية
تستعرض قوتها او قذارتها فوق روسنا
واصعب لحظة ساعة الانتظار
تسمع صوت الصاروخ وهو نازل
ثواني ويقع عالارض
ثواني تحسها سنيـــــــــــــــــــــــــــــن
السبابة تترفع لوحدها
تتشاهد على روحك ميت مرة
تستغفر وتطلب الرضا
تفتكر كل حياتك
وقرب مماتك
الصلاة الي صلتها
والي سبتها
تحس ان الصاروخ نازل
زي السهم على قلبك انت لوحدك
يفرتكك وينثر دمك
تبقى عارف انو نازل اكيد نازل
بس محتار نازل فين
نازل يقطع مين
انت ولا جارك
ولادك ولا ولاد غيرك
......................
اول متتهز الدنيا تاني من حوليك
ساعتها بس تعرف انك لسى عايش
وانو نزل على حد تاني
وقطع غيرك
............
ومفيش وقت تفوق
نرجع من تاني
متعرفش الضرب جاي منين
ولا مين الي بيصرخ اسعاف
ولا مين الي بيقول حموت
ولا الدم ده لمين
ولا الحم ده لحم مين
مسرحية وعمرها متخلص
بس ارضنا ودما ولحمنا
عمرو ميكون رخيص
حتى لو رخصتو الدنيا كلها




ثانيا: رسالتي اوجهها للشعب المصري واخصه بالتوجيه فقدرنا ان نكون جيران فاين من خرج ايام تشجيع المباريات ليصدح بصوته فاين انتم الان مما تقوم به حكومتكم الجليلة من انشاءات هندسية على حدودها !!!

هل علينا ان ندفع ثمن تطبيعها مع انجس الخلق



ثالثا: مشكلة في مدونتي
من بضعة ايام وانا اعاني مشكلة الدخول لحسابي فالمدونة من جهاز حاسوبي فربما على ان اخذ اجازتي السنوية من التدوين لحين حل تلك المشكلة وان شاء الله اعود بعد حل المشكلة

اللهم لك الحمد حتى ترضى
ولك الحمد اذا رضيت
ولك الحمد بعد الرضا

الخميس، 17 ديسمبر، 2009

لاجئـــــــــــ نحن ــــــــــون



بحرب ال48 طلعو الناس من بلداتهم ومدنهم
مهاجرين على اساس كلها كام يوم
والحرب تخلص وكل واحد يرجع لبيتو

- ناس راحت على غزة وناس عالضفة وناس طلعو من فلسطين
وراحو الاردن وسوريا ولبنان-
جدي وجدتي الحمد لله اجو على غزة
واجو هين لينكتبو من ساعتها لاجئين
- جدتي كانت دايما تحكيلي عن بلادنا طبعا
وعن كروم الزيتون والعنب والتين
وتقلي لما نرجع حوريكي الكروم والسوق وارضنا
اقلها ما عادت البلاد زي ما كانت

تغيرت
وصارت بيوت لليهود
تقلي لا انا حعرفها لما نرجع
-كانت لاخر يوم بحياتها على امل ترجع
لبلادها الله يرحمها
عاشو الانتداب البريطاني
ولما طلعت بريطانيا
ورثتنا لليهود على اساس كنا من املاكهم

ومن كلب لكلب يا قلب لا تحزن
اجو على غزة بعد معاناه الهجرة والتشريد
والجوع والبرد


وبعد فتره من تجمع اللاجئين باماكن
كانت الانروا اجت لتقدم مساعداتها للاجئين

اعطتهم خيم واكل ومنها صارو
يسمو التجمعات بمخيمات اللاجئين
ومع مرور الزمن اهتمت فيهم بقدر ما
وتطورت المخيمات وبقت فيها مدارس ووحدات صحية

بس يا ترى وين كان العرب ؟


حسأل وين كانو لما تشردو اهالينا وقت الحرب ؟؟؟؟؟؟؟؟؟؟
وشو اجو عملو بفلسطين ؟؟؟؟؟؟؟؟
ولا اسال وين كانو من قضية اللاجئين ومعاناتهم وقت التشريد والجوع ؟؟؟؟؟؟؟؟
- وليش الانروا ؟؟؟؟؟؟؟؟؟؟
ساعدونا وبيقدمولنا لحتى الان مساعدات
يا ترى لسواد عيونا!!!!
ولا بنكون جا حدين لما نحكي هيك !!!!
ولا لما ينسرق منك ارضك ويعطوك شبر لازم تشكر !!!!
المخيمات كبرت وتوسعت مع الناس وعددهم
والمخيم مقسم لمناطق بنسميها بلوكات
وكل بلوك الو حرف لاتيني يميزو

غزة صار فيها ناسها الاصليين "المواطنين "
واالناس المهاجرين " اللاجئين"
وللاجئين مدارسهم وعياداتهم الي بيميزها لونها الازرق
كنا ندرس عالمنهج المصري ولاجئي الضفة عالمنهج الاردني
باول يوم مدرسي من اي سنة بنجيب معلوماتنا الشخصية
الاسم والعنوان والهوية زي اي طلاب
بس بما انا لاجئين
لازم نجيب معلومات اضافية وهم
بلدتنا الاصلية يعني الي هاجرنا منها
ورقم بطاقة التموين التابعة للانروا


لنعرف من اول يوم انو احنا لاجئين
بس انا كنت افكر دايما
ليش احنا لاجئين
يعني ليش بيسمونا هيك
احنا فلسطينيين وضلينا بفلسطين بعد التهجير
يمكن الي راح بلد تانية بيسموه لاجئ
بس احنا والحمدلله لسه ببلادنا
احنا جيل ما عاش اللجوء الحقيقي
احنا بجنه
بالنسبة لاهلنا الي اتشرو واسابو بيوتهم

واراضيهم وجاعو
وبجنه
بالنسبة للاجئين الي سباو فلسطين كلها
وعايشين عيشة الله بيعلم فيها

يا اخي في ضيعتي بين اليتامى

كم غرقنا فالأسى عاما فعاما

نبتغي الخبز ونستجدي السلاما

لم نجد في دربنا الا الخيانا

يا اخي لن نبلغ القدس نياما

وبجد بالنهاية بحكي من كل قلبي
اللهم لك الحمد حتى ترضى
ولك الحمد اذا رضيت
ولك الحمد بعد الرضا

ولك الحمد على ما ابتليتنا

السبت، 12 ديسمبر، 2009

انتفاضة الحجر وذكريات الماضي


البوست ده بمناسبة ذكرى الانتفاضة الاولى
وهومشترك بيني وبين مدونة
ضحية الحرية

اثنان وعشرون عامًا مضت على اندلاع الانتفاضة الأولى
..
بالفعل لم تكن أحداثًا عادية تلك التي عاشها الفلسطينيون
منذ أن رجموا سلطات الاحتلال قبل 22 عامًا بالحجارة،
بل أحداثًا ثورية شعبية توالت حتى أحدثت تغييرًا
جذريًّا في معالم المشرق الإسلامي.
الذكرى الـ22 لاندلاع الانتفاضة الأولى تمر
والفلسطينيون متمسكون بثوابتهم الفلسطينية،
ويؤكدون يومًا بعد يوم أن الغرب
والاحتلال لن يتمكنوا من سلب أرض فلسطين الغالية
من النهر إلى البحر،
ومن الناقورة إلى أم الرشراش،
كتلة واحدة لا تقبل القسمة.


بداية أحداث الانتفاضة الأولى
بدأت انتفاضة المساجد أو الانتفاضة الأولى
في التاسع من كانون الأول (ديسمبر) من عام 1987م،
وهدأت في العام 1991،
وتوقفت نهائيًّا مع توقيع اتفاقية "أوسلو"
البائسة التي وقِّعت بين كلٍّ من سلطات الاحتلال
و"منظمة التحرير الفلسطينية" عام 1993م.
واستخدم مصطلح "انتفاضة" لأول مرة لوصف الثورة
الشعبية الفلسطينية في أول بيان صدر عن
حركة المقاومة الإسلامية "حماس"
الذي تم توزيعه لأول مرة في غزة يوم
11 كانون الأول (ديسمبر) 1987م،
وأطلق البيان لفظ "الانتفاضة" على المظاهرات العارمة
التي انطلقت؛".
وبعدها دخل المصطلح "انتفاضة" ميدان الصحافة العربية
والأجنبية التي تناقلته بلفظه العربي
كما تلقفته ألسنة المحللين والمؤلفين
حتى في داخل الوسط الصهيوني.
ثوابت فلسطينية ومطالب وطنية
سعى الفلسطينيون عبر انتفاضة الحجارة
إلى تحقيق عدة أهداف يمكن تقسيمها
إلى ثوابت فلسطينية ومطالب وطنية،
كإقامة دولة فلسطينية مستقلة وعاصمتها القدس،
وتمكين الفلسطينيين من تقرير مصيرهم،
وتفكيك المغتصبات الصهيونية،
وعودة اللاجئين دون قيد، وتقوية
الاقتصاد الفلسطيني تمهيدًا للانفصال عن
اقتصاد الاحتلال، وإخلاء سبيل الأسرى الفلسطينيين
والعرب من السجون الصهيونية،
ووقف المحاكمات العسكرية الصورية
والاعتقالات الإدارية السياسية والإبعاد والترحيل الفردي
والجماعي للمواطنين والنشطاء،
وكذلك لم شمل العائلات الفلسطينية
من الداخل والخارج، ووقف فرض الضرائب الباهظة
على المواطنين والتجار الفلسطينيين من قِبَل الاحتلال.

أمنيات التحرر
وحتى هذه اللحظة ينشد الفلسطينيون عبر نشيدهم
الفلسطيني أغاني العزة والكرامة،
أغنيات تحمل في ثناياها معاني الصمود
والتحدي لسلطات الاحتلال التي لا تزال تزرع
القتل والدمار في أرجاء فلسطين الحبيبة
، أغاني يعزف الفلسطينيون على أنغامها ألحان التحرر من الاحتلال

ومن ذكريات الواقع عن الانتفاضة تحدثنا سما /
انا اتولدت بسنة ال87 بالانتفاضة الاولى
انتفاضة الحجر يعني اول سنين حياتي عشها بانتفاضة

لاني كنت صغيرة ما بتذكر كتير شغلات
غير كم صورة ببالي ما بيروحو

صورة الجنود كيف بيقتحمو بيوتنا
وما بيخلو شغلة علىبعضها جواه البيت

وبتذكر ايام منع التجول الي كنا نضل فيها
جوة البيت وما حد بيقدر يطلع ابدا

ويمكن من اطرف واندر الحكايت الي انحكتلي
عن ايام الانتفاضة واليهود

لون النص
حكاية حكتهالي اختي الكبيرة
واكيد القصة حقيقية ما تفكرو اني تخيلتها
القصة عن جنود مرة فاتو على بيتنا وكان اخوي الي اصغر مني
لسه مولود جديد وصار هالحوار بينو وبين اختي
الجندي :هاد مولود جديد عندكو ...شو سميتو ؟ محمد ؟
اختى : لا محنا سمينا قبل هيك محمد هاد حنسميه على اسم سيدي
الجندي : فايدو حجر؟
اختى: لسه صغير ما بيعرف يمسك الحجار
الجندي:طيب ديرو بالكو عليه ولا تخلوه يمسك حجار لحسن نكسرلو ايديه


كل ما كنت اسمع القصة من اختي كنت اضحك على هالغبي
الله يكسر ايديه هو
كانو يقتحمو البيوت ويضربو لو حبو
او ياخدو الهوايا
او يعتقلو الشباب
طبعا كل هاد كان من غيظهم
للشباب الي كانو يرمو عليهم الحجار
بيجنو ويقتحمو البيوت

الأربعاء، 2 ديسمبر، 2009

الحزبية




" ألا إن حزب الله هم الغالبون "


الاحزاب عنا بغزة كتيرة واشهرها فتح وحماس


وصار الوحد زي ما بيسال التاني عن اسمو


بيسالو اذا كان فتح ولا حماس


وما ضل غير انهم يكتبو ببطاقاتنا الشخصيه


يعني بالهوايا لاي حزب احنا مناصرين


انا شخصيا وكتير غير بفضل عدم الحزبية


يعني لا هدول ملايكة ولا هدول شياطين


وكل حزب فيه ناس وناس


والكل عندو ايجابيات وسلبيات


مع اختلاف النسب


لكن بضل مع المقاومة بكل الفصائل


كتير من المناصرين لاي حزب كان


بيوافقوه عالصح والغلط وشو ما عمل بيكون الحق


وبيربي اولادو على انو احنا صح والباقيين غلط


صارو الاولاد الصغار يحكو تماما متل الكبار


عن احزابهم ويتعاركو كمان متل الكبار


كل واحد بدافع عن حزبو وبيحكي انا الصح


وهاي مصيبة يجي جيل ما يعطي حالو فرصة التفكير


ويحكم من غير ما يعرف شو صار


منظر الفرقة والتقاتل بيوجع القلب


يعني احنا مسلمين اخوة بالدين والوطن والدم


واي خلافات مفروض نضل اكبر منها


لانو فرقتنا من مصلحة عدونا اولا واخيرا


ان شاء الله بيجي يوم ما بنضطر نحكي في


حماس ولا فتح


مواطن ولا لاجئ


غزاوي ولا ضفاوي


كلنا فلسطينيين


وكلنا اولا واخيرا مسلمين


واذا كنا كمسلمين بكل بلادنا متفرقين ومناصرين


للقومية والجاهلية كيف حتكون في امة مسلمة؟